Urola Kostako Hitza

Aizarnazabalgo Odrinox enpresatik 300 kilo altzairu herdoilezin lapurtu nahian ari ziren lau gazte atxilotu zituen atzo gauean Ertzaintzak. Herritar baten deia jaso ondoren, ertzainak enpresara joan ziren, eta bertan atzeman zituzten 22 eta 26 urte arteko lau gazteak, altzairua lapurtu nahian.

Ertzaintzak hedabideei jakinarazi dienez, atzo gaueko 22:15 aldera, herritar batek Ertzaintzara deitu zuen, Aizarnazabalgo Odrinox enpresan lapurreta egiten ari zirela susmatuta. Izan ere, enpresaren atarian furgoneta bat zegoen, eta enpresaren barruan jendea ikusten zen.
Ertzaintzaren patruila bat enpresara joan zen, eta furgoneta aurkitu zuen, aurrean bi lagun zituela, eta beste bi atzean altzairu herdoilezina kargatzen ari zirela. Ertzainek ea zertan ari ziren galdetuta, lanean ari zirela erantzun zuten gazteek, "txatarra biltzen".
Ertzainek enpresaren atea aztertu zuten orduan, eta sarrerako atea irekitzeko sistema elektrikoa nolabait maneiatuta zegoela ohartu ziren, eta gazteek furgoneta barruan 300 kilo altzairu inguru zituztela. Horren aurrean, lau gazteak atxilotu zituzten, lapurretagatik.
Gaua atxilotuta eman dute gazteek, eta gaur goizean ziren igarotzekoak Azpeitiako Guardiako Epaitegitik.